Charter Document - 02220099

Je Estevenins sires de Collauour fais savoir à touz ces qui verront et orront ces presantes lettres que je per le loux et per la volunté et par lo consentement de Guinete ma fame ay pris en fié et chasemant dou noble baron Jeham de Chalon signour d'Arlay mon clos de vigne deu tertre de Bussiere liquex siet ou territoire de Chilley et quanque je ay et puis avoir et doi oudit tertre de Bussiere de part moi ne de part ladite Guiete ma fame saul une piece de vigne assisse oudit tertre laquex est appelée la piece Huet laquele je excepte doudit fié et ce fié je promet audit Jeham mon signour per mon soiremant corporelment donné sur saint evangile tenir et garantir franc d'autre fié Et je Guiete fame doudit Estevenim wil outroie loue et consent ledit fié audit Jeham de Chalon doudit Estevenim mon mari et promet audit Jeham pour moi et pour les miens per ma foy et per mon soiremant corporelmant doné sus saint ewangile que je encontre ledit fié ne vendray per moi ne per autruy ne soffreray ne consentiray que autre i viegne et promet encour audit Jeham per ma foy et per mon soiremant de rechief corporelmant donné sus saint ewangile tenir et garantir ledit fié franc d'autrui fié En tesmoignage de ceste chose je lidis Estevenins sires de Collauour ay mis pour moi mon seel pendant en ces presantes lettres et je Guiete fame doudit Estevenim pour ce que je n'ay seel ay prié et requis à religious homme et honeste Pierre humile priour de Lons que il mete son seel pendant en ces lettres avec le seel doudit Estevenim mon mari Ce fut fait ou mois d'avril l'an Nostre Signour corrant per mil CC septante et nuef