Charter Document - 02220098
| Charter Number: | 02220098 |
|---|---|
| Cartulary Title: | Cartulaire de Hugues de Chalon (1220-1319) |
| Charter Language: | Latin |
| Charter Origin: | Lay |
| Charter Type(s): | Recognition |
| Date: | 1279 |
| Date type: | Internal, A.D., Calendar |
| Resource Link(s): |
Patrimoine numérisé de Besançon - MS Droz 21 - Tome 1 (p.202) |
Charter:
Ego Henricus dominus de Husies notum facio universis presentes litteras inspecturis quod cum ego sim homo nobilis viri Johannis de Cabilone domini d'Arlay et teneam ab ipso in feodum aulam mercati mei de Husies cum quibusdam hominibus meis ego sciens et deliberans spontaneus in sana mea memoria constitutus pensata utilitate mea permaxima in augmentacionem dicti feodi recepi a dicto Johanne et recipio in feodum de allodio meo libero ea que inferius sunt expressa villam meam de Sombaucourt exceptis furnis ejusdem ville villam meam de Biens villam meam de Wens villam meam de Ecclesia villam meam de Gouz et villam meam de Rondedale cum omnibus feodis et retrofeodis meis in dictis villis existentibus et cum omnibus pertinenciis appendiciis jurisdictionibus juribus usibus et consuetudinibus earum villarum Item recepi et recipio a dicto Johanne omnes corveas meas tam im pratis quam in campis et omnes terras meas alias cultas et incultas et omnes redditus meos in dominio meo de Husies existentes et quicquid allodii habeo et habere debeo in dominio meo supra dicto excepto feodo quindecim libratarum terre quem teneo in valle de Husies a domino Thirrico domino de Monteforti Item recepi et recipio in feodum a dicto Johanne averias meas videlicet de Capella de Huyns et de grangia de Pissinevache et de grangia de Buyney dicens et confitens per juramentum meum super sancta Dei ewangelia corporaliter prestitum contra predictam infeodationem me nichil fecisse et promittens per idem juramentum nichil contra prehabitam infeodationem aliquatenus me facturum Ego vero Mahadis uxor predicti Henrici predicte infeodationi spontanea scienter et expresse consentio promittens per juramentum meum super sancta Dei evangelia corporaliter prestitum quod per me seu per alium vel alios contra predictam infeodationem nullatenus veniam in futurum In cujus rei testimonium nos predicti Henricus et Mahatidis sigillum curie Bisuntine et sigillum religiosi viri abbatis [Montis] Sancte Marie Cisterciensis ordinis Bisuntine dyocesis una cum sigillo meo videlicet Henrici predicti presentibus litteris apposito rogavimus et fecimus eisdem litteris apponi Actum III kalendas septembris anno Domini MCCLXX nono