Charter Document - 02220097

Je Guillermes de Nam escuiers fais savoir à touz ces qui verront ces lettres que je de mon alluef de Lisigne ay pris en fié et en chasemant cent soudées de terre dou noble baron Jeham conte de Bourgoigne et signour de Salins et de la noble dame Lore sa fame sauve la feauté à monsignor de Montfacon et se je n'avoie lesdites cent soudées de terre à Lisigne je les parfaroie au plus près de Mommaour que je porroie Et pour ce lidiz cuens et ladite contesse ont donné à moy vint livres d'estevenens lesquex j'ay receu en bons deniers nombrez et desquex je me tien pour paiez En tesmoignage de laquel chose à ma priere et à ma requeste li chapitres de Saint Anathoile de Salins ont mis lour seaux pendans en ces presantes lettres Ce fut fait l'an de l'incarnation Nostre Signour Jhesu Crist qui corroit par mil CC sexante et doux ou mois d'octambre