Charter Document - 02220096

Je Wachiers de La Baume chevaliers fais savoir à touz ces qui verront ces presantes lattres que je suis hons lige à la noble dame Lore fame çay en arriers le noble baron Jeham comte de Bourgoigne et signour de Salins et tien de luy ma maison de Nance et demy l'estant de Nance et le pourpris de ladite maison et de ces choses suis je antrez en son homage lige sauve la feauté mons Willame de La Baume mon frere En tesmoignaige de ceste chose à ma priere et à ma requeste li honoraubles homes religious et honestes Pierres priour de Lons et Willermes diens de Lons ont mis lour seaux pendans en ces lettres Ce fut fait le mecredi après la nativité Nostre Dame l'an Nostre Signour qui corroit per mil CC septante et quatre