Charter Document - 02220095

Je Wachiers sires d'Andelost fais savoir à touz ces qui verront ces lettres que je suis hons liges ainsi com je puis et doy à Jeham conte de Bourgoigne et signour de Salins sauve la feauté le signour de Mignet et mons Vauchier de Commercy et les fiés de part le mariage ma fome et tient doudit conte ligemant ma foreste de Myon et quanque j'ai à Myons et à Esterno et à Desserviler en hommes en fiez et en toutes autres choses es territoires desdiz leus et li ay quité tel droit et tel raison com je hi avoie et pooie reclamer ou puy de Monmaour Et lidiz cuens m'a donné un chesal en son chastel de Monmaour et je li doy faire une maison et m'a donné en fié lige et en chasemant et à mes hoirs trente livrées de terre à estevenans en sa rende de son pois de Salins à paier chascun an à moy ou à mes hoirs à l'uctive de la saint Estene de moisons et ne puet ne doit lidiz cuens ne sui hoir retenir mes hommes sour aux ne je les lours et vout lidiz cuens que my hommes d'Esterno et de Deserviler qui son[t] de son fié aient lour usaiges es jours et es autres bois pour maisoner et pour affuier senz vendre et senz doner En tesmoignaige de ceu j'ay mis mon seel en ces lettres Ce fut fait ou mois de may l'an Nostre Signour qui corroit mil CCL et nuef