Charter Document - 02220094

Je Hugues diz Tempestez chevaliers fais savoir à touz ces qui verront ces presantes lettres que je suis hons à la noble dame Lore fame çay en arriers le noble baron Jeham conte de Bourgoigne et signour de Salins et tien de luy en fié quamque je ay et doy avoir ne puis à Evrey et à Esterno en chans em prez em bois en plains en vignes et en toutes autres choses en quelque meniere que je les aie ne puisse avoir et promet à madite dame et tenuz suis de faire l'estage à Monmaour chescun an un mois à la requeste de ly ou des suens En tesmoingnaige de ceste chose j'ay mon seel pendant en ces lettres avec le mien seel Et je Wachiers sires d'Andelost à la priere et la requeste doudit Hugon ay mis mon seel pendant en ces lettres qui furent faites le mardi après l'Apparicion l'an Nostre Signour mil CC sexante et douze