Charter Document - 02220089

Je Richars de Mugnet vicons de Salins fais savoir à touz ces qui verront ces presantes lettres que je tien en fié lige dou noble home Jeham de Chalon signour d'Arlay ma maison fort de Monsajon et toutes les appartenances de ladite maison et tout le territoire doudit leu et quamque i sera ou porra estre ediffiez et tien encour de luy assimant en fié lige la vile de Crotenay et les appartenances et tout le territoire doudit leu et desdites choses suis antrez en son homage lige sauve la feauté le roy d'Angleterre et je et mi hoirs les devons tenir toutjorsmais ligemant de luy et de ses hoirs En tesmoignaige de laquel chose j'ay mis mon seel pendant en ces lettres et j'ay requis et fait metre le seal dou chapitre de Saint Michiel de Salins Ce fut fait le lundi devant feste saint George l'an de l'incarnation Nostre Signour qui corroit per mil CC sexante et seze