Charter Document - 02220086

Je Girars Chambiers chevaliers de Salins faiz savoir à touz ces qui verront ces presantes lettres que je suis hons lige à la noble dame Lore contesse de Bourgoigne et dame de Salins sauve la feauté Estene signour de Valgrenant et ay repris de lui ma vigne de Mernax liquex siet en coste que l'on appelle Pierrefrite liquex vigne toche d'une part à la vigne mons Baduim de Salins chevaliers chastelain de Bracon et d'autre part à la vigne dou prioré de Chastel sus Salins Et est assavoir que après mon decès liquex de mes anfanz que ladite vigne tenra et en la cui partie ale vindra doit estre hons liges devant toutes genz à ladite contesse et de ce enlie je moi et mes hoirs En tesmoignaige de laquel chose à ma priere et à ma requeste li chapitres de Saint Michiel de Salins a mis son seel pendant en ces presantes lettres emsamble le mien seel Ce fut fait l'an de l'incarnation Nostre Signour qui corroit per mil CC sexante et VII ou mois de jugnet