Charter Document - 02220083

Je Pierres diz Esperiz chevaliers de Salins fais savoir à touz ces qui verront ces presantes lettres que con je tiegne et doie tenir pour moi et pour les miens en fié et en chasement ligemant de la noble dame Lore fame çay en arriers le noble baron Jeham [conte] de Bourgoigne et signour de Salins dix livrées de terre lesquex je li doy asseoir bien et loialmant sus une partie de ma terre au regart des proudomes je li ay assis lesdites dix livrées de terre sus quamque j'ay ne puis avoir ou territoire de Loiz c'est assavoir sus la quarte partie dou dieme dou devantdit territoire en blez et en vins et sus un prey que l'on dit le prey Aubry et sus un cham qui siet es Toles et sus siex deniers de cens que je ay sus la maison au prevost de Malpertuis et sus quanque je ay en Jarraise c'est assavoir le prey qui siet de l'une part delez le prey Jeham de Ceys et de l'autre part delez le prey mons Perron de Chambenot et le prey qui siet de l'une part delez le prey mons Jeham Ferrey et de l'autre part delez [le] prey Guiat Alavace et le cham qui siet delez la grange mons Colin Petit Cousin et le pré que l'on dit Papenale et la moitié dou prey qui toche au pré qui fut au signour de Rens et sus vint soudées de cens que li enfans Alis de Clucey me deivent Et se les choses devantdites ne valoient dix livrées de terre je suis tenus dou parfaire à la requeste de madite dame ou des suens et ensi li promet en bone foy En tesmoing de ceste chose j'ay mis mon seel pendant en ces lattres qui furent faites le vanredi après la saint Valantin l'an Nostre Signour mil doux cenz LX et douze