Charter Document - 02220082

Je Hugues diz de La Saule chevaliers faiz savoir à touz ces qui verront ces presantes lettres que je suis hons liges à la noble dame Lore fame çay en arriers le noble baron Jeham conte de Bourgoigne et signour de Salins et ay pris de luy en fié et en chasemant les doues pars de Monjolain la moitié de la piece dou bois dou Raffort la moitié de pré Monier dou cham dou Saon l'uime dou Salat la moie part dou pré qui siet em Mopré que je part à Humbert Guinchet et quanque j'ay ne doi avoir dois le cham de Ernoles tamque à la levée de l'estant es Templiers qui siet entre Pantaise et Saint Didier em bois en chans en prez en vignes lesquex choses sont assisses ou parrochage de Saint Didier et lidiz fié ay je fait pour moi et pour les miens à ladite contesse pour li et pour les suens En tesmoingnage de ceste chose à ma priere et à ma requeste Pierres priours et Willermes diens de Lons ont mis lour seaux pendant en ces lettres Ce fut fait ou mois de jung l'an Nostre Signour qui corroit per mil CCLX et dix