Charter Document - 02220079

Je Estenes de Ceys damoisiaux fil çay en arrier le noble baron Richar signour de Ceys fais savoir à touz cex qui verront et orront ces presantes lettres que con je et li mien et mi aidant eussons fait et tenu domages et enjures à noble baron Jeham de Chalon signour d'Arlay mon signour et en sa terre et à ses homes em plusours lues et em plusours menieres je diz Estenes pour l'amande des devantdiz domages et enjures en recompensation de ces ay doné et doin à toutjour mais heritablemant à devant [dit] Jeham mon signour et es suens les fiez que l'on tient et doit tenir de moy à Mellant et es appartenances de ces luef lesquex fiez Perrin de Mellant fil mons Girart Perrin li Accurteys Willaumes Villemins li Plumate Freriez li enfant Greillat et li fil Richar de Mellant tien[en]t de moy et generalmant quanque j'ai puis et doy avoir en ladite vile de Mellant et es appendises d'iceli en rerefiez en hommes en terres en demeneures coment que ceu soit saul que se my hommes d'Amondans d'Amancey et de Fertens ont riens de demeneure ezdiz leus ceu encepte je Après je repran dou devantdit Jeham mon signour pour l'amande desdites enjures et domaiges en accressement de son fié que je tien de luy le fié que mess Fromons d'Elaise et le fié que Jannins de Criccey tien[en]t de moy et quamque il en tienent en fiez et en rerefiez et en autre meniere comant que ceu soit et me deveste des devantdites choses et le devantdit Jeham am mete em possession corporal ou anssi et promet En tesmoignage de laquel chose j'ay requis à religious home et honeste l'abbé de Buillon que il mete son seel pendant en ces presantes lettres ensamble le mien seel Faites et données l'an Nostre Signour corrant per mil CC septante et oyt ou mois de decembre