Charter Document - 02220078

Je Guienet de Chablie escuiers fais savoir à touz ces qui verront ces presantes lettres que je suis hons liges à la noble dame Lore fome çay en arrier le noble baron Jeham conte de Chalon et signour de Salins sauve la feauté à signour de La Sarrée et ay pris de li quarante soudées de terre à losenois de mon alluef en fié et en chasemant lesquex sunt assises à Wouflens la vile c'est assavoir sus ma vigne assisse derrier la maison Willerme Charpil de Wouflens la vile delez la vigne audit Willerme liquex est à deux fossories et sont assisses sus Jeham Raison de Wouflens liquex est mes hons taillaubles et sus tout son tenemant et ces choses dessusdites sont de mon propre alluef Et ledit fié ay je fait pour moy et pour les miens à ladite dame pour lui et pour les suens Et nous officiaus de la court de Losanne à la priere et à la requeste doudit Guienet avons mis nostre seel pendant à ces lettres en tesmoignaige de verité Ce fut fait en l'an Nostre Signour mil CC et sexante et nuef ou mois de marz