Charter Document - 02220077
| Charter Number: | 02220077 |
|---|---|
| Cartulary Title: | Cartulaire de Hugues de Chalon (1220-1319) |
| Charter Language: | Latin |
| Charter Origin: | Lay |
| Charter Type(s): | Confirmation |
| Date: | 1281 |
| Date type: | Internal, A.D. |
| Resource Link(s): |
Patrimoine numérisé de Besançon - MS Droz 21 - Tome 1 (p.166) |
Charter:
Ego Colinus de Sancto Johanne dictus Petit Cousins miles Salinensis natum facio universis tam presentibus quam futuris quod ego sciens et spontaneus non vi dolo metu precibusve inductus seu ab aliquo circonventus mea et meorum pensata et considerata diligenter utilitate de laude expressa consensu et voluntate Nichole uxoris mee accepi et accipio pro me et meis in ligium feodum et casamentum a nobili domicello Johanne de Cabilone domino de Arlato pro se et suis im perpetuum grangiam meam de Jerrasse cum appendiciis et pertinenciis ejusdem commende et quicquid habeo vel habere possum et debeo in territorio et finagio de Jarraise et in villa de Clucey et territorio et finagio ejusdem ville videlicet im pratis campis hominibus justiciis jurisdictionibus domibus casalibus pascuis nemoribus censibus ortis reditibus et rebus aliis quibuscumque modo et ratione michi pertineat et quocumque nomine censeatur quam grangiam meam cum rebus aliis supradictis habebam tenebam et possidebam francam et liberam ab omni servitutis onere de meo franco et proprio allodio Accepi inquam in ligium feodum et casamentum res predictas pro multis beneficiis et auxiliis mihi a dicto Johanne frequenter impensis nec non et pro sexaginta libris stephaniensium mihi a dicto Johanne traditis et solutis integre tempore hujus contractus im pecunia numerata et de hiis me volo et teneo plenarie pro pagato Confiteor etiam et publice recognosco me ratione et occasione dictarum rerum hominem esse ligium dicti Johannis ex nunc in antea et a dicto Johanne et suis me deinceps et meos im perpetuum dictas res tenere et habere ex causa et modo antedictis et pro dictis rebus dicto Johanni homagium ligium feci et facio et ipsi pro se et suis fidelitatem promisi et promitto meque et meos eidem Johanni et suis legaliter serviturum prout homo sive fidelis domino suo ligio servire debet secundum quod exigunt usus statuta et consuetudines feodorum Que omnia et singula supra dicta prout superius sunt expressa promitto fideliter adimplere firmiter tenere et inviolabiliter observare et nunquam contra premissa vel aliquid premissorum venire in futurum juramento meo ad sancta Dei ewangelia super hiis omnibus supradictis prestito corporaliter promittens etiam per dictum juramentum meum predictum feodum sive dictas res acceptas ut dictum est in ligium feodum et casamentum predicto Johanni et suis deffendere et garantire et pacificare semper et ubique legitime contra omnes abrenuncians Sciendum vero est quod licet predictas res in ligium feodum a dicto Johanne acceperim tamen de ligietate predicti feodi ego quamdiu vixero et non heredes mei immunis sum contra dominos meos dominum de Walgrenant et dominum de Andelost Ego vero prefata Nichola de cujus laude dictus maritus meus fecit universa supra dicta renuncio in premissis per juramentum meum ad sancta Dei evangelia corporaliter prestitum omni juris beneficio et auxilio dotis et donationis propter nuptias certiorata de utroque quia mihi sufficienter cautum est alibi pro predictis In cujus rei testimonium nos dicti conjuges sigilla venerabilium capitulorum Sancti Anatholii et Sancti Michaelis Salinensium presentibus litteris fecimus apponi Datum Salinis mense decembris anno Domini M ducentesimo octogesimo primo