Charter Document - 02220076

Je Humbers de Chilley escuiers à ce tens chastelain de Monmerat fais savoir à touz que je ay pris en fié et en chasemant de mons Jeham de Chalon signour d'Arlay et en suis antrez en son homage dou comandement et de la velonté de mons Phelippe de Vianne signour de Paigney mon signour tout ce que j'ay puis et doi avoir comant que il soit à Saint Moris ne es appendisses doudit leu assis entre Crilley et Grantvaux lesquex choses je tenoie en fié doudit mons Phelippe et a volu et outroié lidiz mess Phelippes que ensi come je le tenoie de lui que je le reproigne doudit mons Jeham En tesmoignaige de laquel chose j'ay requis et supplié audit Phelippe que il mete son seel pendant en ces presantes lettres ensamble le mien seel lequel j'ay mis en ces presantes lettres Et nous lidiz Phelippes willans et consentans lesdites choses ensi con alles sont dessus devisées et qui avons quité et quitons audit mons Jeham le fié dessusdit que de nous tenoit lidiz Humbers et quamque nous avons et avoir poons audit leu par raison doudit fié de Saint Moris avons mis nostre seel pendant en ces presantes lettres à la priere et à la requeste doudit Humbert en tesmoignaige de verité Faites et données l'an Nostre Signour corrant par mil CC octante et quatre ou mois de may