Charter Document - 02220075

Je Richars de Mugnet vuicans de Salins fais savoir à touz ces qui verront ces presantes lettres que cum je tiegne en fié lige Monsajon et les appendisses et la vile de Crotenay et les appartenances dou noble homme Jeham de Chalon signour d'Arlay et en soie antrez en son homage lige sauve la feauté le roy d'Angleterre je wel et outroi et promet audit Jeham par stipulacion sollempne et par ma foy corporelmant donée que se droit aportoit ledit fié de Monsajon à acun de ses partaiges c'est assavoir des hoirs çay en arriers Hugon conte palazin de Bourgoigne frere doudit Jeham ou aucum des hoirs dou pere doudit Jeham qu'il at de la contesse Ysabel rendre et paier deux cenz livres d'estevenans que je ay eu et receu de luy en bons deniers nombrez pour ledit homaige que fait li ay pour la raison dou fié et seroie quites envers lui doudit fié de Monsajon et pour lesdites deuz cenz livres lidit Jehan tindroit et doit tenir en gaige ladite vile de Crotenay et les appartenances come la chose de son fié tantque je ou li miens aussiens paié à luy ou as suens entirement lesdites deuz cenz livres et sitost con je ou li miens aurions paié audit Jeham ou as suens lesdites deuz cenz livres lidiz fiez de Crotenay saroit miens et me seroit d'alluef ansi com devant Et promet audit Jeham pour moi et pour les miens par mondit soiremant que je ne pourechacerai par moy ne par autrui que lidiz fiez de Monsajon parte doudit Jeham et des suens En tesmoignaige de laquel chose j'ay mis mon seel pendant en ces presantes lettres ensamble le seel dou chapitre de Saint Michiel de Salins que je y ai requis et fait metre Ce fut fait le lundi devant feste saint George l'an de l'incarnation Nostre Signour qui corroit per mil CC sexante et doze