Charter Document - 02220074

Je Jeham dit de Ceys chevalier de Salins bailliz de la terre dou noble baron Jehan de Chalon signour d'Arlay fais savoir à touz ces qui verront et orront ces presantes lattres que comme je haie aucunes maignie d'ommes à Esterno à Colens et à Deserviler c'est à savoir [à] Esterno Maiquaignet et Besançon son frere et le fil Deuxlefit item à Colens les enfanz à Peletier et à Deserviler Wachier le Maquat et la sezeinne partie de la forest de Mancie item que cum je aie raison et action et droiture chascun an es charrues et es fromages et fructeries de Deserviler item que cum je tenisse en fié et en chasemant doudit noble baron mon signour autres maignies d'ommes en la vile de Nam c'est assavoir Perrin le fil Jeham au Moinne Perrenim le fil Robert Charrée Girar le fil Paris Amonnier Hemmonet le Chapuis son frere Cristim le fil Hemmonim au Sordet Cuinet Thomas Besençon le fil Costantin Jehannim son frere Huguenim le Donzel et Estevenim le Rosset ensamble lour mex et lour appendisses desdiz mex et generalemant [toutes] autres choses de part mons Jaque de Monmoret mon oncle çay en arrier et de part mons Jeham de Claron c'est assavoir hommes signories justises bois rivieres censes pescheries et autres choses lesquex j'ai conquises par achat doudit mons Jeham de Claron sauz le fié de mons Pierre Baillart et de Perrin de Mansieres lesquex lidiz messires Jehans de Claron retient pour luy et pour les suens quant il me vendit les choses devantdites que il avoit et pooit avoir en la vile et ou territoire de Nam lesquex choses dessusdites de Nam deveuront chescun an audit noble baron mon signor tros livres et trois quarterons de cire je li devantdit Jehans de Ceys bailliz doudit noble baron nonmie deceuz ne controinz ne per force ne per barat ne per paour ne per prieres menez mais de ma bone velonté ay doné baillié quité et outroié permaignablemant et sanz rapeal de moi ne des miens en eschange et en permutation audit noble baron mons Jeham de Chalon signour d'Arlay et es suens toutes les maignies des hommes dessus nommés emsamble lour mès et lour tenemanz et les appendisses desdiz mès et toutes les autres choses dessusdites en quelque meniere qu'eles soient nommées Et ceste chose je ay doné audit noble baron par eschange pour demi quartier de chaudiere assis à Salins ou borc communal en la chaderete liquex demi quartiers de chadiere fust maistre Guillaume de Bame item pour une maison de pierre emsamble le tresfont et les choses qui sont entour ladite maison et ensamble les appendises de ladite maison seaul un fort qui est des appendisses de ladite maison qui siet en la rue liquex maison siet à Salins qui fu premieremant Oudet Dou Biez et après fut audit maitre Guillaume de Baume item pour un prey qui siet ou territoire de Sarcine qui fut audit maitre Guillaume et pour son partaige qu'il a et puet avoir de part le noble baron le conte de Chalon son pere en la vile et ou territoire de Cernens en quelque meniere que ceu soit c'est à savoir en hommes en tailles en justices en signories en servises en censes en rantes ou signories ou en autres choses en quelque meniere qu'eles soient nummées et pour huit vint livres d'estevenans lesquex j'ai eues et receus doudit noble baron mon signour ou nom de torne à tens de cest eschange en bons deniers nombrez et de ces je me tien pour bien paiez Et est assavoir que li heritages dessusdiz que li nobles bers mes sires m'a doné en eschange de mes devantdites choses est de son fié et le tien et doy tenir ligemant de luy en fié et en chasemant Desquex choses dessusdites données en eschange et en permutation je me devist et de celes je envist ledit noble baron mon signour et les [siens] et met em possession corporel par la tradition de cestes presantes lattres prometanz pour moy et pour les miens audit noble baron mon signour et es suens par mon soiremant fait et donné sus saint ewangile corporelmant lesdites choses données en eschange et en permutation loialmant garantir et deffendre et appaisier contre touz adès et en touz leus et nonmie venir encontre cest eschange par moy ne par autrui et non consentir que nuns weille venir encontre dois ores en avant ne apparuemant ne resconduemant Et pour tenir fermemant cest eschange je oblige moi et mes hoirs et mes successours et mes biens et les biens de mes hoirs et de mes successours en la main doudit noble baron mon signour et des suens et renonce En tesmoignaige de laquel chose je li devantdiz Jehans de Ceys bailliz ai requis et fait metre en ces presantes lattres le seel dou religious homme et honeste Guillerme abbé de Balerne Ce fut fait et donné en l'an de grace Nostre Signour qui corroit par mil CC quatre vinz et oit ou mois d'octouvre