Charter Document - 02220072

Je Girars d'Esterno escuiers fil mons Jehan d'Esterno chevalier faiz savoir à touz ces qui verront et orront ces presentes lattres que je de ma bone velonté ay pris en fié et en chasemant de noble baron mons Jeham de Chalon signour d'Arlay touz les homes que j'ay à Bolando emsamble touz lour mex et les appendises d'icels c'est à savoir Huguenim le fil Nichole et le mex qu'il tient Hugon le fil Rolier et le mex qu'il tient Crestin son frere et le mex qu'il tient Robelin fil Bonart et le mex qu'il tient Huguenim dit Apelat et le mex qu'il tient et le mex qui fut Besançon Atyant le mex à Maselier le Lochar de Chenevieres et le mex qu'il tient Crestin Gomel et le mex qu'il tient Jehan dit Bole et le mex qu'il tient Bonart le fil Richar de Beugelieres et le mex qu'il tient Hugon fil Perrier et le mex qu'il tient Estevenat fil Rolier et le mex qu'il tient Botin et le mex qu'il tient Villemin fil Coleton et le mex qu'il tient Crestenat de Bogelières et le mex qu'il tient et toutes les apartenances des devantdit mex liquex mas sunt assis en la vile ou territoire et ou finage de Bolando em prez en champs en terres en chesaux em maisons et en chenevieres Après j'ay ausi pris en fié et en chasemant doudit mons Jeham quanque j'ay et tien en la vile et au territoire de Bolando et puis tenir en ladite vile jusque au jour que ces lettres furent faites et recognos que ces choses devantdites tenoie je d'alluef ançois que je preisse en fié doudit mons Jeham Et en recompensation et en renunciation dou devantdit fié j'ay eu et receu dou devantdit mons Jeham cinquante livres d'estevenans en bons deniers nombrez saul ce que quamque je acquerray ou porray acquerir dois ci en avant outre les choses dessusdites ne doit estre dou devantdit fié Et toutes ces choses dessusdites ay je promis et promet pour moi et pour mes hoirs adit mons Jeham et à ses hoirs tenir et garder et nonmie venir encontre par moy et par autrui par mon soiremant corporelmant donné sus saint ewangiles En tesmoignaige de laquel chose j'ai fait metre en ces letres le seel de [l'official] de la court de Besançon Ce fut fait et donné le lundi après feste saint Lorant l'an Nostre Signour mil CC octante et VI