Charter Document - 02220071

Je Hugues diz Rox chevaliers demorant à Dammartin fais savoir à touz ces qui verront et orront ces presantes lettres que je de mon bon espont gré et par ma propre velonté suis devenuz hons à noble baron Joham de Chalon signour d'Arlay et entrez suis en son homage sauve la feauté à mes premiers signours c'est à savoir mons de Monfacon mons de Jou le conte d'Açourre Aimez d'Arguel et l'abbé dou Mont Sainte Marie et ay pris doudit Jehan mon signour en fié et à toutjoursmais mes hommes de Dommartin et lour mex et lour tenemanz c'est à savoir Estevenon dit Garat Vuillemet dit Papion qui est fil à la Baube Jonet Amadri et Besançon enfant Girar à Tissot le Legum et touz lour hoirs et touz lour mès et lour tenemanz per ensi come il les tiegnent de moy Après j'ay pris doudit Jeham mon signor toutes les terres arables et non arables que Perrin de Boujaille fil Estene de Danmartin tient de moy quelque part qu'eles soient en fié Après je lidiz Hugues ay pris doudit Joham mon signour en fié de ma propre demeneure et de mon propre heritaige XVIII jornaux de terre arable assis ou leu où l'on dit à la fontaine ès Malates et XII jornaux es Moitures et sus la terre de Lore XXVII jornaux et mon cham de la Perriere qui contient deux jornaux assis delez le chemin de Pontaillié et de Salins et en Mamont le prez [de] XVII soitours en quel l'on fait VII charrées de foin et en la Chaintre le prez à une charrée de foin et siex jornaux de terre arable assis ou cham delez l'oie dou Molin et deux jornaux es Planches delez l'oie Hostalet Et toutes ces choses devantdites par ensinc comme eles sunt dessus devisées je lidiz Hugues ay promis et promet per mon soiremant doné sus saint ewangiles corporelmant garantir et deffendre audit Jeham et es suens contre toutes genz en jugement et deffuers par stipulation solempne En tesmoignaige de laquel chose je lidiz Hugues ai requis et fait metre en ces presantes lattres le seel à noble baron Henri signour de Jou mon signour et le seel à religious homme Jaque abbé dou Mont Sainte Marie de l'ordre de Citiaux de la dyocese de Besançon Faites et données l'an Nostre Signour corrant per mil CC septante et VII