Charter Document - 02220070
| Charter Number: | 02220070 |
|---|---|
| Cartulary Title: | Cartulaire de Hugues de Chalon (1220-1319) |
| Charter Language: | French |
| Charter Origin: | Lay |
| Charter Type(s): | Confirmation |
| Date: | 1300 |
| Date type: | Internal, A.D., Feast |
| Resource Link(s): |
Patrimoine numérisé de Besançon - MS Droz 21 - Tome 1 (p145) |
Charter:
Je Jehans de Nam escuiers fais savoir à touz que je suis [de] venuz hons à noble baron et puissant mons Jeham de Chalon signour d'Arlay et suis antrez en son homage et li ai fait feauté pour cent soudées de terre censez lesquex il m'a donné en fié à paier chascun an à la feste saint Michiel de menoe coursauble en l'arceveschie de Besançon et pour trente [livres] de ladite menoe lesquex j'ai receu de lui en bons deniers nombrez Et pour ce je doy faire une maison en la vile de Joigne enqui où il plaira mondit signour et la davons maintenir je et mi hoir et devons la garde dou chastel de Joigne en temps de guerre par quatre jours et se mesdiz sires a longue guerre ou il ou sui hoirs je et mi hoirs li devons aidier et luy servir ansi com sui hommes et sui feaux et ce je li promet luy et ses hoirs pour moi et pour mes hoirs garder et tenir en bone foy En tesmoignage de laquel chose j'ai doné ces presantes lettres à nostredit signour seelées à mes prieres et à ma requeste des seaux à religious homme mons l'abbé de Balme et mons l'abbé dou Mont Sainte Marie Faites et données en l'an Nostre Signour mil CCC le lundi devant l'Ascension