Charter Document - 02220068

Je Girar de Waus escuiers fais savoir à touz ces qui verront ces presantes lettres que je suis hons à la noble dame Lore fame çay en arrier le noble baron Jeham conte de Bourgoigne et signour de Salins sauve la feauté mons Girar de Ruigney mons Renat de Saint Martin et celui qui tenra le val de Voitours et hay pris de ladite dame et tient de li en fié et en chasement ma vigne de Biaumont qui siet entre les doux clous l'abesse de Chastelchallon et la vigne Villerme dien de Lons d'une part et la vigne mons Perrin Grenet de l'autre part et ledit fié ay je fait pour moy et pour les miens permaignablement à ladite dame et es suens En tesmoignage de ceste chose à ma priere et à ma requeste li religious et honorable hons et discreit Pierre priour de Lons et Willerme diens de cest meisme leu ont mis lour seaux pendant en ces lettres en tesmoignaige de verité Ce fut fait le mercredi après l'uictaive de la nativité saint Jeham Baptiste l'an Nostre Signour mil CC sexante et dix