Charter Document - 02220067

Je Pierres sires de Chestoillon fais savoir à touz que je pour mon grant profit ay mis en gaige pour cinquante et nuef livres d'estevenens en la main de noble baron Jeham de Chalon signour d'Arlay mon signour Hugonet et Morel de Dampierre mes hommes et toutes les choses que je puis ne dois avoir en toute la Chaderlie en hommes et en toutes autres choses en toutes les menieres que je les puisse ne doige avoir sauz les fiez des gentishommes lesquex choses sunt de son fié lige lesquex cinquante et nuef livres je ai au et receu doudit mon signour en bons deniers nombrez et sont tornez en mon profit Et ces choses [dessus] dites je li promet par mon soirement donné sus saint ewangile corporelment tenir et garder et garantir en touz leus et encontre toutes genz En tesmoignage de ce j'ay mis mon seal pendant en ces presantes lettres données le mardi après la purification Nostre Dame l'an mil CC octante et IX