Charter Document - 02220064

Je Jehans de Bynan chevaliers faiz savoir à touz ces qui verront ces presantes lettres que je tien de la noble dame Lore fame çay en arrier le noble baron Jeham comte de Bourgoigne et signour de Salins en fié que l'on appele le dyeme Saint Aignien qui siet à Ruffey à Bers et à Quintegney et en quelque leu que il sie em blez et en vins et le meys Costantin de La Tothiere et les apertenances doudit meys et en suis antrez en l'omage lige à la[dite] dame sauve la feauté mons Jeham de Chalon signour d'Arlay En tesmoignage de ceste chose pour ce que je n'ay seel li honoraubles hons et discreit Willermes diens de Lons à ma priere et à ma requeste a mis son seel pendant en ces lettres qui furent faites le lundi après l'uitaive de la saint Martin l'an Nostre Signour qui corroit par mil CC sexante et douze