Charter Document - 02220061

Je Huedes d'Esterno chevaliers faiz savoir à touz ces qui verront ces presantes lettres que je recognois et di en verité que je tien et ai pris en fié et en chasement dou noble baron Jeham de Chalon signour d'Arlay toutes mes choses ci desoz escriptes lesquex furent de mon propre alluef Premieremant Huguenin d'Esterno fil Frivolant et ses doux freres Villemin le Corvoisier Richart et ses freres Perrat le Juge Lambert son fil Estevenin Dou Pont la fome Hemmonim Dou Pont Paris son fil l'Escotierres Juliet Estevenin d'Ornens le Bal Robert le fil Adriem la Rampaude Wachier de Ruigney Huguenim son cousin et touz lour mas et lour tenemant et sex jornax de terre qui sient ou territoire d'Esterno laquele terre je conquis de monsignour Jeham de Claron chevalier et part à la maison dou Temple d'Amancey et doux jornaux de terre qui sient à la porte dou bourc de Monmaour que l'on apele le cham des Barrates et quatre jornaux de terre en la fin de Faie et le prey de Biezvalon et lou cham et le prez des Pontaz et le pré de Cornat qui part à Hugon de Faie et le pré à Borgier et le prez des Barrates qui partent à Wachier et Othenim et Jaquet de Colens et lour mas et lour tenemanz et nuef chasalz à Colens et XXIIII jornaux de terre en la fin de Colens lesquex l'on appelle la terre es Barangiers et la terre de la Fichelainne qui siet ou territoire d'Esterno Et toutes ces choses tien je en fié dou devantdit Jeham mon signour et quamque je ay avoir ne puis je ne doy d'aluef en la chastelenie de Monmaour et es viles dessusdites Et reconos que je tien encores en fié doudit Jeham mon signour quanque je ay et tien et puis avoir à tenir de part madame Nichole ma fame en la vile de Monmellon ou territoire ou finage et es appendises de ladite ville de Monmellon en quelque chose qu'elles soient Et je ladite Nichole recognos que lidiz Odes a cest fié fait per ma velonté et per mon exprès consentement et le weil et le m'i consent et promet per mon soiremant doné sus saint ewangiles que je ne le rappeleray jemas ne ferai rappeller ne n'iray encontre ne feray à aler Et nous officiaux de la court de Besançon à la priere et à la requeste des devantdiz Odon et Nichole avons mis en ces presantes lettres le seel de la court devantdite de Besançon en tesmoignage de verité Faites et données le lundi devant saint Andrey l'an Nostre Signour corrant per mil CC septante et VIII ou mois de novembre