Charter Document - 02220059

Je Jehans de Vianne sires de Mirebel en montaigne fais savoir à touz ces qui verront ces presantes lattres que je ay vendu et ven quitté et baillié et delivré à noble baron mons Jeham de Chalon signour d'Arlay quanque j'ay et puis et doi avoir ansi de part moy com de part la compaignie que je ay as signours de Gigney en Ylay et es appertenances doudit leu entierement sanz riens retenir en hommes en champs em prez em bois en rivieres en justices et en toutes autres choses en quelque meniere et par quelque raison que je riens i aie et puisse et doie avoir pour cent livres d'estevenans lesquex j'ay eu et receu doudit mons Jeham de Chalon signour d'Arlay en bons deniers nombrez et desquex je me tien pour bien paiez Et ceste vendue ai je fait adit mons Jeham de Chalon signour d'Arlay par le loux et par la velonté dou noble baron mons Jehan de Vianne mon signour [et] mon frere de cui fié lesdites choses vendues sont et promet adit mons Jeham de Chalon signour d'Arlay par mon soiremant corporelmant doné sus saint ewangile tenir garder et garantir ladite vendue luy et es suens pour moy et pour les miens et que encontre ne venrai per moy ne per autrui ne soffrerai que autres i viegne En tesmoignaige de ceste chose je ay mis mon seel pendant en ces lettres et à ma priere et à ma requeste lidiz Phelipes de Vienne sires de Paigney mes sires et mes freres a mis son seel pendant en ces lettres auvec le mien seel Et je lidiz Phelippes de Vienne sires de Paigney qui wil loue et outroie adit mons Jeham de Chalon signour d'Arlay les choses vendues dessusdites qui sont de mon fié à la priere et à la requeste doudit Jeham de Vienne mon frere ay mis mon seel pendant en ces lettres auvec le sien seel en tesmoignaige de verité Ce fut fait le vanredi qui fut l'andemain de feste saint Pere et saint Poul l'an Nostre Signour corrant per mil CC octante et quatre