Charter Document - 02220056

Nous Symons de Monbeliart sires de Montron faisons savoir à touz ces qui verront et orront ces presantes lettres que nous pour nous et pour les nouz sumes devenuz hons de main et de bouche dou noble baron mons Jeham de Chalon signour d'Arlay et li avons fait homage et feauté pour lui et pour ses hoirs à toujoursmais sauve la feauté nostre amé nevour Richart signour d'Anteigney et sauve la feauté noble baron Humbert dalphin de Viannois et signour de La Tourt Et en avons repris doudit mons Jehan et en reprenons pour nous et pour les noz en fié et en chasement tout ce que nous avons poons et davons avoir à Deserviler à l'Abergement de la Jouz en la Jou à Septfontainnes à Esveler à Bolando à Silley à Chantrens [et] es territoires et appartenances de cezdiz leuz en quelque meniere que ceu soit en demeneures en justices en fiez en rerefiez en bois en champs em prez en rentes en molins en hommes en tailles en cences et en toutes autres choses queles qu'eles soient ou comant qu'eles soient appelées que nous avons esdiz leus senz riens excepter lesquex choses dessusdites toutes sont et estoient au jour que ces lettres furent faites de nostre propre et franc aluef Et est assavoir que cesdites choses reprises de nous en fié doudit mons Jeham nous li assetons et avons assis pour onze vint livrées de terre à estevenens et se cesdites choses ne valoient lesdites onze vint livrées de terre nous li donons et prometons asseoir audit Jeham et en franc alluef au regart des proudomes toutes foiz que nous en sarions requis de luy ou de son comandement au plus près des leus dessusdiz Et pour ceste reprise et pour l'omaige et feauté faites de nous par ensi come dessus est contenus nous cognossons et confessons que nous avons eu et receu doudit mons Jeham mil et cinc cenz livres d'estevenens en bons deniers bien et loialment nombrez et de laquel somme d'argent nous nous tenons pour bien paiez et en quitons ledit mons Jeham et les suens dou tout en tout Encores avons nous aussi confessé et confessons que nous avons repris et reprenons doudit mons Jeham auvec les choses dessusdites et de franc alluef tout ce que nous avons et poons avoir comment qu'il soit à Esternoz dessoz Monmaour Et toute ces choses et une chascune per soy avons nous promis et prometons pour nous et pour nouz hoirs à toutjour mais par nostre soirement doné sus saintes ewangiles adit mons Jeham et es suens par solempne stipulation tenir et garder fermement sanz venir encontre par nous ne par autrui et garantir deffendre et appasier encontre toutes genz et en touz leus et que nous ne avons fait ne farons chose per que les choses dessusdites ne aient force et valour En tesmoignage de laquel chose nous avons mis nostre seel en ces presantes lettres ensamble le seel de honorable persone et discrete l'official de la court de Besançon lequel nous avons requis par Estevenin dit Dou Marchié clerc juré et notaire de la court de Besençon en ces presantes lettres en tesmoignaige de verité et que lidiz officiaus nous contraigne à tenir et à garder ces covenances par sentence d'escumeniement et par l'entredit metre en nostre terre senz autre exception de fait ou de droit metre avant Faites et données le juedi après la saint Nycholaus d'yver l'an Nostre Signour mil CC nonante et quatre