Charter Document - 02220055

Je Hugues de Tempestez de Saint Agne chevaliers fais savoir à touz ces qui verront ces presantes lettres que je doy à la dame Lore çay en arrier fame le noble baron Jehan conte de Bourgoigne et signour de Salins XXV livres de viennois lesquex je ai receu de li à emprent en bons deniers nombrez et pour lesquex XXV livres je li met en gaige et enloie en sa main quantque je ay à Esterno et à Evrey que je conois de son fié Et li promet par mon soirement doné corporelment sour saint ewangile que je n'entreray à Saint Agne ne en la forteresce tanque je li aie mis autre seurté à son grey de cesdites XXV livres se n'est per sa velonté En tesmoignaige de ceste chose je ay mis mon seal pendant en ces lettres qui furent faites le mardi après l'uictive de seint Pere et de seint Poul l'an Nostre Signour qui corroit per mil II sexante et XI