Charter Document - 02220054

Je Guillermes d'Abbens escuiers faiz savoir à touz ces qui verront ces lettres que je ay mis et met en gaige à noble baron mons Jehan de Chalon signour d'Arlay et en sa main quantque je ay à Nans et à Sarraz et en la forest de Sarraz et quanque je ay en la chastelenie et en la terre de Monmaour en hommes em prez em champs en bois en demeneures et en toutes autres choses en quelque meniere que je les y aie et puisse et doie avoir lesquex choses toutes sunt dou fié doudit Jehan de Chalon signour d'Arlay pour sexante livres d'estevenens lesquex je ay eu et receu de luy en bons deniers nombrez et tornez en mon profit et desquex je me tien pour bien paiez Et desdites choses je me suis desvestiz et envesti lidit Jehan de Chalon signour d'Arlay et met em possession corporel ou assi [et] promet par mon soirement donné sus saint ewangile garantir ladite gaigiere contre toutes genz En tesmoingnaige de ceste chose j'ay mis mon seal pendant en ces lettres et ay fait metre le seal mons Girart d'Arguel auvec le mien seal Ce fut fait le mecredi après l'annunciation Nostre Dame l'an Nostre Signor corrant mil CC octante et cinc