Charter Document - 02220051

Nous Hugues cuens palatins et nous Alis contesse palatine de Bourgoigne faisons savoir à touz ces qui verront et orront ces presantes lettres que nous par l'acourt et par l'outroy dou noble baron Jehan conte de Bourgoigne et signour de Salins nostre chier pere avons receu dame Lore fome doudit Jehan à fome lige pour le chastel de Monmaour qu'ale a repris de nous ligemant et pour Chalemont Boujaille Noseroy et tout le val de Meges et les appendisses et toutes les autres choses assises ou puis et ou val de Salins et autre part où que ce soit en fiez et en demenures que lidiz Jehans ai outroié et devisé as enfans que il ai et aura de ladite en lour partie et lidiz Jehans a assigné à ladite sa fame en douaire après luy desques devantdites choses ladite Lore est entrée en nostre homage pour li et pour ses enfans Et est assavoir que nous pregnons et recevons ladite Lore et ses enfans que ele a et aura doudit Jehan mon pere ensamble lour choses en garde et en maintenance et suimes tenuz per nostre soiremant sur saint ewangile corporelment donné garder et saver en bone foy lour et lour choses et especialment mantenir et garder contre toute genz de nostre pooir en jugement et deffuers tel partie cum lidiz Jehans a devisé à sesdiz enfans de ses biens en tel partie cum lour en avenroit après luy et tel douaire con lidiz Jehans a assigné et outroié à ladite Lore sa fame En tesmoignaige de laquel chose nous avons mis nous seax pendant en ces presantes lettres Ce fut fait l'an de l'incarnation Nostre Signour qui corroit per mil et II sexante et trois le mecredi après Pasques