Charter Document - 02220049

Nous Hugues cuens palatins de Bourgoigne façons savoir à touz ces qui verront ces lettres que come li nobles bers Jehans cuens de Bourgoigne et sires de Salins eut retenu son pooir ou devis qu'il avoit fait de ses heritages de ses biens et de ses possessions à nous et à ses autres enfans d'ordener et deviser ses fiez et ses homages si comme ceste retenance est contenue es lettres qui devant ces presantes lettres furent faites de son devis il a ordené et devisé en son bon sant et en sa bone memoire et en sa sainne conscience et par sa propre volonté un ordenement en tel maniere c'est à savoir qu'en entantion de bien et de pais et pour ce que tuit sui enfant qui après lui demorront et tuit cilz qui en lour pooir saront ansi li povre come li riche puissent vivre en bone pais selonc Deu et pour ce se guerre ou contanz movoit entre lour et aucun baron ou entre nous maisme de l'un vers l'autre que il hi eust un par dessus qui pooir eust de l'apaisier en tel meniere que nous et nostre frere et les genz de nos terres puissons demorer et vivre senz descorde en bon estat selonc Deu Et pour ce que aucun de ses anfans ne pooit faire homaige à acun par quoi la baronie et ce que Deux li a soffert à conquerre par sa grace et avoir pout estre departiz ne apetisiez et venir en tout ou en partie en autruy pooir et en autrui signorie que de ses hoirs et que on ne le preist en fiez d'autrui que de ses hoirs il par regart de pitié en Deu et par desir de perdurable pais et amour demorer entre touz ses anfanz qui de luy demorront devient hons liges à nous Hugues son ainnel fil et reprenz de nous le puiz de Salins et toute la baronie et la signorie de Salins c'est à savoir Chalemont le val de Meges et quanque il tenoit en fiez et en demeneures en quelque meniere que il les tenoit et quanque autres tient de luy et tout son remanant sauz ce que il retient le pooir d'ordener les fiez que on tient de luy lesquex il ordenera plus loialment que il porra et quelque ordenance que il en face il wet que tuit sui hoir qui aucune chose an tenront en demoroient en nostre lige homaige Et wet et comande que nous lidiz Hugues repreigniens et desserviens des signours de cui il tient et wet que après son decès nos lidiz Hugues repreigniens Bracon de l'abbé de Saint Morise de Chamblay et que cilz de ses hoirs à cui partie Bracon vendra le tiegne ligemant de nous et wet que tous les fiez de signories repreignons et desserviens de ces de cuy il les tient et cil à cui partie il vendront les tiegnent ligemant de nous et wet que tuit li enfanz qui de luy demorront entroient en nostre lige homage et tiegnent de nous ligement quanque il tenront de part luy Et nous Hugues l'en devons garantir et deffendre contre touz hommes tant come il vivra et après son decès devons porter garantie pour toutes ces choses à ses autres anfans loialment come sires contre touz ces qui riens lour en porront demander Et pour ce que par cest ordenement ci devant devisés et escript nous Hugues an portons avantaige nous en recompensation de ce donons quitons et asseons à devantdit Jehan nostre pere siex cenz livrées de terre qui sont devisées à la nostre partie que après son decès doivent venir à nous ou puiz de Salins si com il est contenuz es letres que nous avons de luy qui parolent de nostre partie Et lesdites VI livrées de terre nous Hugues et Alis nostre fame donons et asseons au devantdit Jehan pour amander son testament et pour crestre les parties à ses autres anfans à sa velonté ou pour faire ou pour ordener de tout ce qui li semblera que l'en fera Et volons et outroions que quelque ordenement et quelque don que il en face soit estaubles Et lidiz Jehans wet et outroie que lesdites VI livrées de terre sauz ce que il en ordenera por le descombremant de s'arme soient et remaignent de nostre fié quicunques les tiegne Et s'est à savoir que cilz ordenement ci devant devisez et escript sont fait et outroié sauz les mariaiges que il a ordené et doné à ses filles qui sont marié jusque à ce que se en ces mariaiges [on tient] riens de son fié ou dou fié le comte de Borgoigne il wet que on le tiegne de nous Et pour ce que ces choses soient fermes et estaubles avons nous Hugues et Alis ma fame fait seeler ces letres de noz seaux et dou seal de religioux home Wachier abbé de Goile Ce fut fait l'an Nostre Signour MCC cinquante et nuef ou mois de jenvyer