Charter Document - 02220048

Je Jehans de Jouz chevaliers faiz savoir à touz ces qui verront et orront ces presantes lettres que je ay repris en fié ligemant de noble baron monsignour Jehan de Chalon signour d'Arlay mon chier signour et bien amé ma maison de Livremont tout ansi come ele s'estent sanz riens excepter et la vile de Lievremont ensamble toutes les appartenances d'icele sauve la feauté de Nostre Dame de Monbenoit Et encores reconois et confesse per ces presantes lettres que je ay repris en fié ligemant de mon devantdit signour la moitié de la garde de l'iglise de Monbenoit et des biens et des appartenances d'icele c'est assavoir dois Arçons en aval laquele dite garde je tenoie d'aluef Et toutes ces choses dessus nommées ay je reprins ansi com dessus est dit pour moy et pour les miens de mon devant nommé signour pour luy et pour les suens en accreissance dou fié que je tenoie jà de lui En tesmoignaige de laquel chose je ay mis mon seal pendant en ces lettres faites et données le mardi après le dimenche que l'om chante Reminiscere l'an Nostre Signour mil CC nonante et nuef ou mois de mars