Charter Document - 02220046

Nous officiaux de la court de Besençon faisons savoir que li nobles bers mess Pierres fil çay en arier le noble baron mons Symon de Joinvile signour de Jaiz et de Mernay a recognu et confessé en droit par devant nous que il est hons liges devant touz hommes de noble baron mons Jeham de Chalon signour d'Arlay et en tient en fié lige et en chasement doudit mons Jeham de Chalon signour d'Arlay le chastel de Mernay et le bourc et quanque il i puet et doit avoir et tenir oudit chastel de Mernay et es apartenances et es appendises et en toute la chastelenie doudit chastel de Mernay en quelque meniere que ceu soit en hommes en prez en champs en bois en rivieres en cours d'aigues en molins foules et batours en alluef en fié en rerefiez et especialment le fié de Royffey sus l'Oignon en leis en justices costumes services et autres choses coment qu'elles soient nummées lesquex choses sunt dou fié lige doudit mons Jeham ensi con lidiz messires Pierres l'a confessé en droit par devant nous fuer que lou fié dou conte de Bourgoigne et dou conte de Bart Et ai confessé en droit par devant nous lidit messires Pierre que il doit aidier loudit mons Jehan de Chalon son signour lige doudit chastel de Marnay et dou bourc et de toute la chastelenie contre toutes genz et qu'il ne puet faire autre signour lige mais se par aventure avenoit que audit mons Perron escheit aucune terre ou aucune signorie de part sa mere ou de part aucun autre outre la Jouz il la puet recevoir et faire son devoir ou de homaige ou d'autre chose selonc ce que la terre ou signorie le requerroit Et ai promis lidiz messires Pierres par son soirement donné sur saint ewangiles et sur l'obligement de touz ses biens que il contre ladite confession ne venra per luy ne per autrui ne consentirai que autres vigne encontre mais la tenra fermemant et gardera permaignablement Et quant à ce obligie lidiz messires Pierres luy et ses hoirs en la jurisdiction de la court de Besançon veillent et outroient que se il ou sui hoir voloient venir contre lesdites choses que nous les puissons controindre par sentence d'escumeniemant en lour persones ou d'entredit en lour terre où que il fussent senz metre exception avant renunciant En tesmoignage de laquel chose nous avons mis le seal de la court de Besançon à la requeste doudit mons Pierre en ces lettres faites et données le lundi après la feste de la purification Nostre Dame l'an Nostre Signour qui corroit par mil CC octante et huit ou mois de fevrier