Charter Document - 02220041
| Charter Number: | 02220041 |
|---|---|
| Cartulary Title: | Cartulaire de Hugues de Chalon (1220-1319) |
| Charter Language: | Latin |
| Charter Origin: | Lay |
| Charter Type(s): | Agreement |
| Date: | 1236 |
| Date type: | Internal, A.D., Feast |
| Resource Link(s): |
Patrimoine numérisé de Besançon - MS Droz 21 - Tome 1 (p.95) |
Charter:
Ego Galcherus dominus de Commercy notum facio presentibus et futuris quod super discordiis habitis inter dominum meum Hugonem ducem Burgundie et me Galcherum et filios meos Symonem et Guillelmum pax et concordia facta est in hunc modum quod ego intravi in homagium dicti domini ducis ita quod in comitatu Burgundie et ultra Sonnam sum homo ligius dicti ducis ante omnes salva ligiatione aliorum dominorum meorum et teneo ab ipso duce Castrum Villani in Jura et Montem Rovelli jurabilia et reddibilia ipsi duci et heredibus ejus Promisi etiam eidem duci quod ego nec heredes mei firmabimus aliquid nec aliquam forteresciam faciemus apud Castrum Villani nec in castro nec in colle nisi per voluntatem et consensum dicti ducis vel heredum suorum Preterea Symon et Guillelmus filii mei intraverunt in homagium dicti ducis ante omnes ita quod ille qui tenebit dicta castra post me erit homo ligius dicti ducis ante omnes nisi ita contingeret quod absit quod tota terra mea ad unum heredem deveniret quia tunc heres ille esset homo prefati ducis sicuti ego sum Et si alter filiorum meorum videlicet Symonis et Guillelmi intraverit in homagium dicti ducis pro dictis castris alter erit ab homagio ducis liberatus Item ego Galcherus et filii mei jus si quod habebamus in calderia de Salinis posuimus in voluntate dicti ducis et promisimus eidem duci quod homines suos nec heredum suorum retinebimus super nos nec ipse debet retinere nostros In cujus rei testimonium presentem paginam sigillo meo confirmavi Datum apud Mirebellum super Besuam anno gratie [M]CCXXXVI die festo sancti Egidii mense septembris