Charter Document - 02220039

Nous officiaux de la court de Besançon faisons savoir que messires Wachiers li juenes chevaliers fil mons Gauchier de Commercey signour de Monrivel et de dame Marguerite de Beleveuvre feme doudit signour de Monrivel a confessé et coneu en droit par devant nous que il de l'auctorité dou comandemant et de la velonté son pere dessusdit ensi come lidiz Wachiers le dit est entrez en l'omage lige devant touz de noble baron mons Jehan de Chalon signour d'Arlay et ay repris doudit Jeham en fié lige le chastel de Chatelvilain rendable et jurable pour luy et pour ses hoirs à toutjour mais et toutes les appendises et toutes les appartenances doudit chastel et a repris en fié lige la chastelenie doudit chastel et toutes les appendises et les appartenances de ladite chestelenie c'est à savoir Syrous Conte Gilloy Gyleret Len Traffay Cren Senz l'abergement dessus le Chestelvilain Le Chaleme La Perroinne le fourt de Fonterine les jous les bois les justices les laic les rivieres les estans et les appartenances et les fiez et les rerefiez de touz les leus dessus nommez et des apartenances et des appendises de ladite chestelenie et repren en fié lige quanque il a puet et doit aveir conquester et edifier au chastel et es viles et territoires et es appendises et es appartenances doudit chastel et des leus dessusdiz Et reconoit lidiz Wachiers li juenes par devant nous en droit que toutes les choses dessusdites toutes et une chascune par soi messires Gachiers ses peres tenoit doudit mons Jeham de Chalon signour d'Arlay ligemant en la forme et en la maniere dessusdite Et a promis lidiz Wachiers li juenes pour luy et pour ses hoirs et pour les siens per son soirement doné sus sainte ewangiles adit mons Jam et es suens tenir fermemant et garantir permaignablemant toutes les choses dessus devisées et escriptes en la forme et en la maniere dessusdite Et wet et outroie lidiz Wachiers se il ne le fasoit ou se il venoit encontre les choses contenues en ceste lettre ou aucunes d'eles que nous li officiaux qui adonc seroit l'escomeniessiens et feissiens noncier et excomunier en quelque leu et quelque dyocese que il fut ou feist sa anairsion et s'est submis quant à ce luy et ses hoirs et ses successours en ceste chose à la jurisdiction de la court de Besançon et a confessé en droit par devant nous toutes les choses dessusdites estre veraies et a renuncié encores per son soirement donné sus saintes ewangiles en cest fait expressement de sa certaine science à toutes exceptions de barat de paour de force de coaction de exception de circunvention de puissance de pere et à toutes exceptions raisons allegations et costumes qui porroient estre oposées outre ces presantes lettres encontre cest presant fait et à droit que dit que generay renunciacion ne vaut En tesmoignaige de laquel chose nous à la requeste doudit Wachier le juenes avons mis le seel de la court de Besençon en ces presantes lettres qui furent faites le vanredi après l'octave de la resurrection Nostre Signour Jhesu Crist l'an de grace corrant MII IIIIxx et treze ou mois d'avril