Charter Document - 02220036

Je Jehans sires de Durnay faiz savoir à touz ces qui verront ces presentes lettres que come je querelasse et demandasse vint livrées de terre à noble baron Jeham conte de Bourgoigne et signour de Salins lesquex il me devoit assaoir par la raison dou fié de nuef chastel de Willafens et d'autre fié que de lui tenoie j'ai acourdé et appasié à luy en tel meniere que lidiz cuens m'a assis quinze livrées de terre en la rente de son puis de Salins en accressement dou fié que de lui tenoie lesquex XV livrées de terre sont à paier à moy ou à mon certain comandement chascun an à la feste saint Johan Baptiste Et par l'assisse desdites XV livrées de terre je clain quite ledit conte de toutes queralles et de touz chalonges que je pooie et devoie avoir vers luy par raison de fié ne de retenues jusque au jour que ces lettres furent faites Et est assavoir que lidiz cuens m'a comandé que je tiegne en fié lesdites XV livrées de terre de son amé nevour Amey de Monbeliart signour de Monfacon mon signor auvec l'autre fié que je tenoie deque doné a au devantdit Amey En tesmoignage de laquel chose j'ay mis mon seel pendant en ces presantes lettres Ce fut fait en l'an de Nostre Signour mil CC sexante et doux ou mois d'avril