Charter Document - 02220034

Je Amey sire de Monfacon fais savoir à touz ces qui ces lettres verront que Jehans cuens de Bourgoigne et sires de Salins mes sires et mes oncles a doné à moy et es hoir de mon cors en fié et en chasemant le chastel de Willafens et toutes les appartenances et fais savoir que je d'ice[luy] chastel de Willafens le doy aidier et recepter à grant gent et à petites contre toutes genz Et se estoit chose que je ne eusse hoir de mon cors et d'eux feit son comandement de moy après mon decès il est tenus de paier douz cent livres d'estevenens à moy ou à mon comandement et li devantdit chastiaux de Willafens et les appartenances toutes doivent repairier au devantdit Jehan conte de Bourgoigne et signour de Salins et à ses hoirs Et faiz [savoir] que il li devantdiz Jeham cuens de Bourgoigne et sires de Salins mes sires et mes oncles m'a doné et es hoirs de mon cors en fié et en chasement Rossoy et les appartenances toutes et se c'estoit chose que je ne eusse hoir de mon cors li devantdit chastiaus de Rosoy et les appartenances toutes doivent repairier après mon decès à luy et es siens En tesmoignage de verité je l'en ay baillié ces lettres seellées de mon seel Ce fust fait en l'an de l'incarnation Nostre Signour mil CC et XL et VI ou mois de septembre