Charter Document - 02220033

Je Ameys sire de Monfacon faiz savoir à touz ces qui ces lettres verront que je tien de mon chier oncle Jeham conte de Bourgoigne et signour de Salins en fié et en chasement Willafens et les appendises en acroissance dou fié que je tient de luy ce est assavoir de II livres que il m'a assis de panre chascun an aus chadieres de son puis de Salins c'est à chascun respons X livres et se aucune chose an defailloit li derriers respons rendroit toute la deffaillance des devantdites doux cenz livres desquelles doux cenz livres li cuens Estenes ses peres me donna C livres de rente en fié et en chasemant à tenir permaignablemant à moy et à mes hoirs qui de mon cors itront lequel dom des devantdites cenz livres li devantdit Jeham mes oncles me conferma et assiment lidiz Jehans me dona les autres cent livres à tenir permaignablement à moy et à mes hoirs qui de moy istront en toil maniere que je li devantdit Amey tien dou devantdit Jeham conte de Bourgoigne mon oncle et signour de Salins le devantdit Willafens et les appendises rendables à luy tant come il vivra Et s'il avenoit chose que il trespessat de cest siegle je ou my oir le devons tenir de ses hoirs de plain fié Et [si] par aventure avenoit que je murise senz hoir de mon cors li devantdiz chastiaux c'est [assavoir] Willafens et les appendises et les doux cenz livres de rente doivent au devantdit Jeham mon oncle ou à ses hoirs en teil meniere repairier que il ou sui hoir qui vorront ravoir le devantdit chastel de Willafens seront tenuz de rendre douz cent livres d'estevenans à moy ou à mon comandement pour faire ma velenté ou à ces en cui main je leroie le chastel [et] les devandites douz C livres ne autrement il ne sui hoir ne puet ravoir le devantdit chastel Et pour ce que ceste chose soit ferme et estauble je li devantdit Amey sires de Monfacon ay seellé ces lettres de mon seel qui furent faites en l'an de l'incarnation Nostre Signour MCC et quarante et doux au mois de marz