Charter Document - 02220031

Nous Jehans cuens de Borgoigne et sires de Salins faisons savoir à touz ces qui verront ces presentes lettres que Ameys de Monbeliard sires de Monfacon nostre nies per nostre volonté et per nostre comandemant est entrez en l'omaige la contesse Lore nostre fome en tel meniere que nous prometons loialmant et à bone foi que nous ladite Lore nostre fame et à ses hoirs que de nous a et aura de nous ledit homaige en lour partie droit et loial que fait lour avons et encour ferons sauve nostre featé à nostre vie et en tel meniere que nous ne hoir que nous aions autre que li suens ne puissent riens reclamer audit homage se ensi n'estoit que ladite Lore que Deux ne vueille morust senz hoir que de nous eust En tesmoignage de laquel chose à nostre priere et à nostre requeste Humbers nostre sire religious abbes de Saint Oyant de Jou a mis son seal pendant en ces presentes lettres ensamble le nostre Ce fut fait l'an de l'incarnation Nostre Signour qui corroit par mil CC et sexante ou mois de janvier