Charter Document - 02220030

Je Guy Galafin chevaliers fais savoir à touz ces qui verront et orront ces presentes lettres que je suis hons liges devant touz autres signors à noble baron mons Jehan de Chalon signour d'Arlay mon très chier et redouté signour et confesse par ces presentes lettres que j'ai repris de luy en fié ligement les choses ci après escriptes c'est assavoir ma maison fort de Couge et tout le tertre où ele siet ensi comme il se depart tout à la raonde item le meys à Roy de Couges et les apertenances de celuy item le meys es enfant Renaut de Visin assis ou territoire de Josel item le meys es enfans Humbert Moiron de Nance item la vigne de la Coste assisse ou territoire de F[r]ontenoy dessoz la vigne mons Estene Le Mellet de Frontenay et generalment quamque je ay puis et doi avoir es parrochaiges et es territoires de Frontenay de Blaterans de Nance de Coigefort en fiez en rerefiez en signories en justises granz et petites en hommes tailles censes courvées prez champs vignes bois aigues decours d'aigues et estant molins fours pescheries foresteries messons et toutes autres choses comant qu'eles soient nommées et apelées Et ay promis et promet pour moi et pour les miens par mon soirement et par ma bone foy et sus l'obligation de touz mes biens meuables et non meuables presenz et à venir à mon devantdit signour que je luy ou son hoir à cui partaige mes fiez vendroit recepteray à grant force et à petite encontre toutes genz toutes foiz que mestier li sera et j'en seray requis per luy ou per ses genz en ma maison de Couge et es recet Et sont tenuz mi home et li habitant en la vile et ou territoire de Couge de siegre à armes le cors de mondit signour tout soulement ou son hoir à cui partaige mes fiez vendra en ost et en chevachie toutes foiz qu'il en seront requis c'est à entandre es despens de mon devantdit signour Et toutes ces choses dessusdites je promet par mon seiremant et sus l'obligation de touz mes biens pour moy et pour les miens à mon devantdit signour et es suens garder et tenir fermement senz jamais venir encontre En tesmoignaige de laquel chose j'ay requis et fait metre en ces lettres le seal dou chapitre de Saint Anathoile de Salins et le seel mons Pierre dit Boya curé à ce temps d'Arlay Faites et données l'ultime jour dou mois de joing l'an Nostre Signour corrant par mil III et trois