Charter Document - 02220029

Nous officiaus de la cour de Besançon faisons savoir à touz ces qui verront et orront ces presentes lettres que en nostre presance pour ce especialment estaubliz et venant en droit et en jugement per devant nous nobles damoisiax Hugues de Vianne sire de François confessa et publiement reconut que il pour luy et pour ses hoirs et dou consentement exprex Belet de Braces sa fome a repris en fié lige de noble baron monsignor Jeham de Chalon signour d'Arlay la ville de Chambournay sus l'Oignon et tout quanque lidiz Hugues a puet et doit avoir en ladite vile et appendisses d'icelley en homes en rentes en cences em tailles em bois en molins en eaux en decours d'eaux en signories en justises en fié en chasement et en toutes autres choses coment qu'eles soient nommées ou apelées lesquex choses dessusdites reprises en fié lidiz Hugues conost qu'elles estoient à tenir de ces lettres et devant dou propre alluef adit Hugue et dou sa fame Et ces choses dessusdites lidiz Hugues pour luy pour sa fame et pour ses hoirs les fait et estaublit dou fié lige à devantdit mons Jeham de Chalon et des suens et en est entrez en son homage Et pour raison de ces choses reprises en fié lidiz Huguenins de Vianne cognost par devant nous que lidiz messires Jehans de Chalon li ai donné baillié et delivré C livres de petiz tornois desquex il se tient pour bien paiez Et ces choses dessusdites et une chascune par soi lidiz Hugues a promis et promet par sa foy en nostre main adit mons Jehan tenir garantir et deffendre fermement senz venir encontre et contre toutes genz Encour a promis et promet lidiz Hugues que lidite Belat sa fame toutes ces choses dessusdites en la main doudit mons Jehan louera ratifera et approvera et en fera lettres desouz le seel de la court de Besencon Et à toutes ces choses tenir et garder fermement lidiz Hugues vuet et outroie que nous le controignons par sentence d'escumuniemant sanz nulle exception de fait ou de droit metre avant En tesmoignaige de laquel chose à la priere doudit Hugue de Vianne avons mis le seel de la court de Besençon en ces lettres faites et données le vanredi après la saint Vincent l'an Nostre Signour corrant par mil et CCC