Charter Document - 02220027

Je Pierres dou Loveret fil çay en arrier Huguenin d'Arlay fais savoir à toz ces qui verront et orront ces presentes lettres que je suis hons liges devant toutes genz et devant touz autres signours à noble baron à mons Jeham de Chalon signour d'Arlay et que je ay pris en fié lige de luy toutes ces choses ceanz escriptes Premierement c'est assavoir ou cham de la Levée quatre quartauls de bleyf de rente ou cham de la Charriere quatre quartaus de bleyf de rente en Valiot trois muys de vin de rente en ce meisme leu I muy de vin de rente es Esquarres VI quartauls de blez de rente entre Pymont et la fontainne de Rogin IIII muis de vin de rente sus Pendant un muy de vin de rente en cest meisme leu une vigne qui est moie propre affort VI quargie de vin de rente en I prey qui siet en Chadon XX soulz d'estevenens censals de rente Et ces choses toutes je lidiz Pierres ay pris novelement en fié lige dou devantdit noble baron de mons Jehan de Chalon signour d'Arlay mon bien amey signour generalment et especialment [et] toutes autres choses quel que elles soient et puissent estre ou doigvent et qui avenues me sunt à mon partaige en quelque meniere que ceu soit de part pere et de part mere soit en justice et en signorie en conquises ou en eschoites en recompensation des bienfait et des cortoisies que lidiz nobles bers a fait à moy Pierre devantdit et fera encores et pour un don de VI livres d'estevenans lesquex j'ai eues et receues de lui en bon deniers nombrez et de quoi je me suis tenus pour bien paiez Et pour ce je lidiz Pierres ay promis par mon soirement donné corporalmant sus saint ewangile pour moy et pour les miens que encontre ces convenances ne encontre la tenour de ces letres je non irai ne ferai autrui aler pour moy en nulle meniere quel qu'ele soit dois or en avant en jugement ou fuers jugement Et est assavoir que je lidiz Pierres ay baillié pour moi et pour les miens au devantdit noble baron à mons Jeham de Chalon signor d'Arlai mon bien amé signour le fié que Humbers dou Loveret tenoit de moi et le fié Jordam mon frere sic que il sunt homme lige à mondit noble baron à mons Jeham de Chalon signour d'Arlay En tesmoignaige de laquel chose je lidiz Pierres dou Loveret ay requis et fait metre en ces presentes lettres les seaux de religiouses persones et honestes de frere Rogier humile priour de Lons le Saunier de frere Humbert humble priour de L'Estoile et le seaul de saige persone et honeste de mons Jaque de Saterot curé dou Loveret Faites et données l'an de grace corrant par MCC et nonante ou mois de decembre