Charter Document - 02220026

Je Guienet de Quintegney clers diz de La Roche fais savoir à touz ces qui verront et orront ces presentes lettres que je suis hons liges devant toutes genz et devant touz autres signors à noble baron monsignor Jeham de Chalon signor d'Arlay et que j'ai pris en fié lige de luy toutes ces choses cy après escriptes Premierement c'est à savoir ma partie de toutes les maisons des celiers des plaitres de celes qui partent à Jeham de La Roche mon frere ma partie de tous les truiz et des plaitres de ces lesquies choses sunt assises à Quintegney ma partie d'um cultil assis dever chiés Alardet et le vergier et part li cultis à Jeham mon frere de rechief toute la vigne qui siet en Tremontoit delez la vigne Humbert de La Roche d'une part et la vigne Alardet d'autre senz partie de Jeham mon frere les vignes des Dessors toute senz partie doudit Jeham la vigne dou Mont sanz partie doudit Jeham et siet delez la vigne Bertelet de Quintegney d'une part la plantée des Boschaz que li Painaz de Quintegney planta à my plant et siet delez la vigne à devantdit noble baron la vigne qui est dessus l'Orme senz partie doudit Jeham et siet delez la vigne Aymonin de La Roche ma partie d'une piece de terre arauble qui siet en Trementoit delez le chemin par lequel l'on va dois Quinteigné à Girefontainne et part audit Jeham ma partie d'une autre piece de terre arable qui est apelée li chams de Granz Chams et siet delez la terre Perrenin fil au Putuat de Quintegney et part audit Jeham ma partie dou cham assis dever chiés Rodet de Quintegney qui part audit Jeham ma partie dou cham qui est nommez li chams de la Sene assis delez le chemin et part adit Jeham mon frere Et toutes ces choses je lidiz Guienet ay pris en fié lige dou devantdiz noble baron mons Jeham de Chalon signour d'Arlay mon bien amé et redouté signor generalment et especialment et toutes autres choses quel qu'eles soient puissent estre ou doigent que avenues me sont à mon partaige en quelque meniere que ceu soit de part pere et de part mere soit en justice et en signorie en conquises ou en eschoites c'est à savoir en recompensation des biensfais et des courtoisies que lidiz nobles bers messires Jehans a fait à moy Guienet et fera encores et especialment pour un don de XV livres d'estevenans lesquex j'ai eues et receues en bons deniers nombrez et douquel je me suis tenuz pour bien paiez prometant je lidiz Guienet par mon soirement donné corporalmant sus sains ewangiles pour moy et pour les miens que encontre ces convenances ne encontre la teneur de ces lettres je ne iray ne ferai autrui aler pour moy ne consentiray autruy aler en nulle meniere quex qu'elle soit dois or en avant en jugement ou en deffuers jugement taciblement ou expressement En tesmoint de laquel chose je lidiz Guienet ai requis et fait metre en ces presantes lettres le seel de religiouse persone et honeste de frere Humbert humile priour de L'Estoile ensamble le seel de honorauble persone et honeste de mons Estene curié de Roiffé Faites et données l'an de grace corrant par mil dou cenz et nonante et VII ou mois de may