Charter Document - 02220025
| Charter Number: | 02220025 |
|---|---|
| Cartulary Title: | Cartulaire de Hugues de Chalon (1220-1319) |
| Charter Language: | French |
| Charter Origin: | Lay |
| Charter Type(s): | Confirmation |
| Date: | 1237 |
| Date type: | Internal, A.D. |
| Resource Link(s): |
Patrimoine numérisé de Besançon - MS Droz 21 - Tome 1 (p.63) |
Charter:
Sachent tuit cilz qui verront ces lettres que la paix de Jeham conte de Bourgoingne et de Chalon et de Villaume de Vianne est faite en ceste memoire que li devantdiz cuens a reconu ledit Villaume de Vianne à homme lige de tel chasement come li pere Villaume fut hons le conte Estevenon nommeement dou fié de Mascon et de Maanois où Biauregart siet ou territoire et Villaumes li ai creu son fié de Virechastel et doné et guerpi permaigneblement Seint Agne tel droit con il i avoit et de cest fié li cuens de Chalon promet Villaume come bon sire à son homme que il li iert aidant et consoillant et maintenant de plait et de guerre droit façant et droit prenant et per cestu escort doit estre tenue la paix de Villame et de Ysabel la contesse de Vianne si com il est contenus en lour chartres et pertant sont appaisies toutes les discordes dou conte de Chalon et de Villaume de Vianne Et est assavoir que Turons et Burons sont dou fié de Maanois et par ceste pais est cheuz Pymont et la mote de Lons permaigneblement Et pour ce que ce soit ferme chose et estauble [je Villaumes] de Vianne ay seellé ceste chartre de mon seel Et ce fut fait en l'an de l'incarnation Nostre Signor millenie ducentenie trente et septenie ou mois de may