Charter Document - 02220024

Je Humbers de Quintegney dit de La Roche fais savoir à touz ces qui verront et orront ces presentes lettres que je suis hons liges devant toutes genz et devant touz autres signors à noble baron monsignor Jeham de Chalon signor d'Arlay et que j'ai pris en fié lige de lui ces choses toutes ceanz escriptes Premierement c'est à savoir quatre piece de terre arable assisses ou finage de Quinteigney emqui où l'on dit es Seignes une autre piece de terre arable enqui où l'on dit en la Cuyson une piece de terre arable en Tremontait une autre piece de terre arable en la vile de Quinteigney doux curtix le quart de tout quanque est ou vergier qui siet darrier la maison Perron de La Roche en Tremontait doues pieces de vigne assignées delez la vigne Guinet et delez la vigne Alardet dit de La Roche en cham Martin une piece de vigne qui siet delez la vigne Juhetain de La Belevevre ou cham des Fosses une piece de vigne qui siet delez la vigne Alardet de La Roche Et ces choses toutes je lidiz Humbers ai pris en fié lige dou devantdit noble baron mons Jeham de Chalon signor d'Arlay mon bien amé et redouté signor generalment et especialment [et] toutes autres choses quel que elles soient et puissent estre ou doigvent et que avenues me sont et à mon partaige et en quelque meniere que ce soit soit de part pere ou de part mere soit en justice ou en signorie ou en conquises ou en eschoites c'est à savoir en recompensation des biensfaiz et des courtoisies que lidiz nobles bers a fait à mons Humbert devantdit et fera encores et por un don de X livres d'estevenans lesquex je lidiz Humbers ay eues et receues de luy en bons deniers nombrez et douquel je me suis tenus pour bien paiez Et pour ce je lidiz Humbers ay promis par mon soirement doné corporelment sus saint evangile pour moy et pour les miens que encontre ces covenances ne encontre la tenour de ces lettres je non iray ne feray autruy aler pour moy en nulle meniere quel que elle soit dois or en avant en jugemant ne deffuers jugement En tesmoing de laquel chose je lidiz Humbers ay requis et fait metre en ces presantes lettres les seaux de religieuses persones et honestes de frere Rogier humile priour de Lon le Saunier et de frere Humbert humile priour de L'Estoile et le seaul de honorauble personne et saige monsignor Estene curé de Ruphie Faites l'an de grace corrant par mil CC et nonante ou mois de decembre