Charter Document - 02220023

Je Perrins de Ceys donzel fils çay en arriers mons Humbert dit de Ceys fais savoir à touz ceys qui verront ces presentes lettres que je ay vendu outroié et quité et baillié à noble baron Jehan conte de Bourgoigne et signor de Salins et à Lore contesse de Bourgoigne et dame de Salins sa fame et à lour hoirs qui seront segnor de Monmaour quanque je avoie et devoie avoir ou par moy ou par mes hommes et quanque je tenoie et mi hommes tenoient en bois en prez en terres gaignables ou en autres choses dois la terre de pré Mymin tanque au pié dou pui de Monmaour et dois le biez de Roschant envers Monmaour par ensi come il s'en va et s'emporte par cornet vers L'Abergement pour IIIIxx livres d'estevenans lasquex je ai receu doudit Jeham et de ladite Lore en deniers nombrez Et ay promis en bone foy audit conte et à ladite Lore garantir ladite vendue contre toutes genz lour et lour hoirs qui saroient signours de Monmaour et ay gurpi tout droit et toutes exceptions qui aidier me porroit à venir contre ladite vendue Et est assavoir que je suis devenus hons audit conte et à ladite Lore et ay pris par plain homaige de lour quanque je avoie ou devoie avoir Esternoz et ou terretoire à Nant et ou terretoire à Sarraz et ou terretoire et meisment en la forez de Sarraz et ou molin et quanque je avoie à Colons et ou terretoire et quanque je avoie et mes freres Philippe avoit de Mellant et ou terretoire et moismement quanque je avoie ou devoie avoir et je et Philippe mes freres en Cruesmont en quelque choses lesdites choses soient en prez en champs em bois en hommes en riveres en justises en signories et en toutes autres choses tanque au pié dou pui de Monmaour Et est assavoir que je ay promis audit conte et à ladite Lore et de lour hoirs ensi com les autres choses dessus divisées et cilz fiez ne doit partir dou signour de Monmaour En tesmoint de laquel chose à ma priere et à ma requeste li religious hommes Amarriz abbes de Montbenoit Wachiers abbes de Goile et li chapitres de Saint Anatoile de Salins ont mis lour seaux pendant en ces presentes lettres Ce fut fait l'an de l'incarnation Nostre Signour qui corroit par mil II et LX et doux li sambadi après la quinzene saint Pere et saint Poul