Charter Document - 02220022

Je Jehans de Vianne sires de Mirebel damoisiax fais savoir à touz ces que verront et orront ces presentes lettres que je ay promis et promet par mon soirement doné sus saint ewangile corporelment que je ne vendray engagerai obligerai ne en autrui main ne osteray de la moie le fié de Mugnet que l'on tient et doit tenir de moi se il n'est de la volenté et dou consentement exprest de noble homme monsignor Jehan de Chalon signor d'Arlay mon signor et en obligerai moi et les miens et les moies choses en la main audit Jehan mon signor à la poinne de trois cenz marz d'argent lesquels trois cenz marz je vueil et outroy de ma bone velonté que lidiz Johanz mes sires puet et deust lever et avoir de moy et de mes choses Et ai promis et promet encour par mon soirment dessusdit et par stipulation sollempne lesdiz trois cenz marz d'argent paier adit monsignour Johan de Chalon ou à son comandement en non de poinne se ensi estoit que je fusse par moi ne par autrui encontre ces covenances dessusdites En tesmoint de laquel chose j'ai mis mon seel pendant en ces presentes lettres et hai requis à honorauble homme et saige l'official de la court de Besençon que il mete le seel de ladite court en ces lettres ensamble le mien seel Fait et donné à Besençon le juedi après la Penthecoste l'an Nostre Signor corrant par mil CC octante et quatre