Charter Document - 02220018

Nous officiaus de la court de Besançon faisons savoir à touz que par devant maistre Guillaume de Mostier Autepierre nostre commandemant especial por ce envoié aquel quant à ce nous avons comi et cometons par ces lettres nostre foies estaublis nobles damoisiaux Jehans de Monbeliart sires de Monfacon d'une part et noble baron et puissant messires Jehanz de Chalon sires d'Arlay d'autre part lidiz sires de Monfacon fit homage et featey adit signor d'Arlay et reconut et confessa per devant nostredit comandement ledit monsignor Jehan presenz et recevans ladite confession que il tient et doit tenir de lui en fié et en homaige le chastel viez de Villafanz et les appendises et ce qu'il a et que l'on tient [de lui es] apertenances et le chastel nuef de Villafanz et les apertenances sauz Varnierfontainne et ce que il a et que l'on tient de lui à Nancray qui fut des contaubles et cinc cenz livrées de terre ou puis de Salins Et cest homaige ceste confession fit lidiz sires de Monfacon en la presence de mons Symon par la grace Deu abbé de Baume et de mons Thiebaut signour de Varre de mons Jehan de Vercex chenoine de Besançon et de plusors autres tesmoins à ce apelés En tesmoint de laquel chose à la relacion doudit nostre comandement aquel nous avons pleniere foy nous avons mis le seel de ladite court en ces lettres Donné le juedi devant feste saint Jeham Baptiste l'an de grace mil CCC et nuef