Charter Document - 02220016

Nos frater Guido humilis abbas Sancti Eugendi totusque ejusdem monasterii conventus notum facimus universis presentes litteras inspecturis quod cum haberemus plures jures ex concessione imperatorum cum omni plenaria libertate et integritate prout in preceptis et privilegiis ipsorum imperatorum super hoc nobis concessis continetur nos attendentes quod dicte jures ab imperatoribus nobis [concesse] melius possent per virum illustrem dominum Johannem comitem Burgundie et dominum Salinensem tueri et ad culturam redigi quam per alium nos ipsi comiti et heredibus suis concedimus in perpetuo feudo et casemento nostras jures infra terminos subsequentes in presenti cartula annotatos contentas videlicet sicut Orba exit a lacu Quinconeys et currit versus lacum de Quiarnens et a Braciolis sicut pendet Niger mons usque ad lacum Quinconeys et sicut tenditur a dicto lacu Quinconeys usque ad Siccam et ad Calmam siccam et a Calma sicca usque ad Lustrellos et a Lustrellis usque ad Marrenses et a Marrensibus usque ad terminos de Mutua et etiam nostras jures inhabitatas ultra jam dictos terminos ex parte superiori versus Pontarlier et versus Joigne prout continetur in preceptis et privilegiis ipsorum imperatorum super hoc nobis indultis ab ipsis imperatoribus et quicquid habebamus vel habere debebamus in predictis locis Jurensibus infra nunciatos terminos contentis scilicet nemoribus terris pratis aquis et rebus aliis excepto quod in terminis et infra terminos de Mutua continetur Sunt autem termini prioratus de Mutua a loco qui dicitur Crosey usque ad prioratum de Mutua et ab ipso prioratu usque ad Gerlans et a Gerlans in transverso usque ad montem qui vocatur Thalamos et ab ipso monte usque ad alium montem de quo emanat fluvius qui vocatur Dubius et etiam totam dependentiam ipsius montis sicut est in respectu apud prioratum de Mutua Et hec omnia nos abbas et conventus retinemus cum omni jure et plenaria libertate ad opus dicti prioratus de Mutua Alia vero prenunciata loca Jurensia sub tali conditione prenominato comiti et heredibus suis in perpetuo feudo et casamento concedimus quod si per industriam ipsius habitata et ad culturam redacta fuerint nos habebimus integre in omnibus edificiis tam castris quam villis etiam aliis edificiis que inibi fient omnium proventuum medietatem videlicet furnis molendinis collectis censis banno et justitia in pedagiis si inibi instituerentur et in omnibus aliis commodis et proventibus quibuscumque et dictus comes habebit medietatem excepto quod in decimis et oblationibus sepulturis et ecclesiarum patronatibus et in omnibus aliis que ad jus spirituale pertinent prenominatus comes vel successores sui nihil habebunt sed hec omnia plene et integre in omnibus locis prenominati casamenti nos recipiemus et habebimus Et sciendum quod pro medietate proventuum quam in dicto feodo et casamento habebit dictus comes ipse tenebitur partem nostram contra omnes tueri et in omnibus integram et illesam servare Adjectum est etiam quod neque dictus comes neque heres ipsius qui dictum casamentum tenebit illud vendere permutare alienare alteri conferre vel a manu sua dejicere seu per partes dividere potest Sciendum est etiam quod nos majorem nostrum seu prepositum vel castellanum in medietate nostra instituemus qui prenominato comiti vel ejus mandato fidelitatem jurabit Comes quoque suum instituet in sua medietate qui nobis vel mandato nostri fidelitatem jurabit et hoc faciet quilibet ipsorum cum de novo fuerit institutus nec alter majorum seu prepositorum vel castellanorum sine reliquo poterit ponere legem vel judicare censam seu collectam facere nec aliquid aliud facere vel accipere sed ambo insimul exercebunt et facient ea que ad juridictionem pertinebunt et etiam que ad utilitatem dominorum suorum et habitatorum dicti casamenti cognoverint expedire Promittit etiam bona fide nobis dictus comes quod nec ipse nec successores sui homines terre nostre recipient vel habergabunt in castris villis sive in aliis edificiis que in dicto casamento fient Domino concedente nec a terminis in presenti carta nominatis in ultra versus Sanctum Eugendum per se vel per alium laborabit vel edificabit vel usagium seu juridictionem aliquam habebit sicut nec habuit unquam Item sciendum quod nos de voluntate et expresso consensu nostro et dicti comitis retinuimus quod homines nostri libere et quiete et sine omni inquietatione possint in juribus que in dicto casamento fuerint omne usagium habere et exercere et omnia illa accipere et habere que ad utilitatem et profectum eorum viderint expedire exceptis campis pratis et pascuis Si vero aliquid invenerint in terminis superius nominatis ancipitres falcones vel hujusmodi grossas aves tertia pars cedet inventori et due partes comiti et abbati Ne igitur ad hoc possit induci suggestione malorum ut a predictis pactionibus quod absit dictus comes vel heres suus resiliat ipsas pactiones integras et intemeratas sepe dictus comes jurat fideliter attendere et servare et ad hoc tenendum et faciendum et jurandum ipse comes prout melius potest se et successores suos in perpetuum obligat Et si forte quod absit pactiones predictas dictus comes et successores sui in aliquo infringerent nisi infra quadraginta dies postquam a nobis vel mandato nostro essent requisiti injuriam nobis factam emendarent et ablata in integrum restituerent archiepiscopus Bisuntinus qui pro tempore ibi esset sine juris sollempnitate et cause cognitione ad requisitionem nostram in personam dicti comitis vel heredum ipsius excommunicationi et terras suas subjiciet interdicto quod quidem venerabilis pater archiepiscopus Bisuntinus ad instantiam memorati comitis pro se et successoribus suis nobis facere promittit Ut igitur istud quod supra dictum est maneat inconcussum nos predictus abbas Sancti Eugendi et conventus ejusdem monasterii presenti carte sigilla nostra duximus apponenda in testimonium et munimen omnium premissorum Actum et datum anno Domini millesimo ducentesimo sexagesimo sexto mense novembris