Charter Document - 02220015

Je Guillaumes d'Arguel escuiers fais savoir à touz ceuz qui verront et orront ces presentes lettres que je regardant et considerant mon profit non mie contrainz ne deceus par losanges ne par autre cause mais de bon grey et de bonne volenté et par le consoil de bonnes genz et de mes amis suis antrez en l'omage et en la feautey de noble baron et puissant mon très chier et bon amé seignour Jehan de Chalon signor d'Arlay et ai repris por moy et por mes hoirs en fié et en chasement doudit Jehan et de ses hoirs permenoblement tout quanque j'ai puis et doy avoir en la vile de Buires desouz Arguel en la vile de Pugey de Lerno de Busey et de Vorges ensamble tout quanque je ai puis et doi avoir esdites viles ou finage et ou territoire as appendises et as appartenances de icelles en mez en terres en prez em bois en fours en molins en rivieres en decours de rivieres en tailles en rantes en vignes ou en justises en seignories en bans en rantes en fiez et en rerefiez et en toutes autres choses quelqu'eles soient et comment qu'elles soient nommées et appellées senz riens retenir à moy pour quatre cenz livres de bone et loial monnoie coursauble que je ay eu et receu doudit Jehan en deniers lealment nombrez et tornez en mon profit Lesquex choses dessusdites reprises en fié je lidiz Guillaumes aie promis et promet lealment pour moy et pour mes hoirs par sollempne stipulation et par mon sairement fait et donné sus sainz ewangiles corporelment audit Jeham et à ses hoirs permaigneblement comme celles qui estoient de mon franc aluef garantir appaisier et deffendre adès en tout leus et encontre toutes genz et que je encontre la feauté et les choses dessusdites ne venray ne consentirai que autres y viegne Et quant à la garandie dessusdite porter et es choses dessusdites tenir et garder par ensi com il est dessus devisez je ai obligié et oblige en la main doudit Jeham et des suens moi et mes hoirs et touz mes biens où que il soient et pussent estre trovez Et renonçois par mon soirement dessusdit à toutes exceptions de deception de circonvention à benefice de restitution pour quelque cause que ce fut à ladite some d'argent non mie eue non mie tornée en nostre profit et à toutes autres reisons allegations de fait et de droit et de costume par lesqueles les choses contenues en ces presentes lattres porroient [estre] en tout ou em partie enfraintes quessées et anullées à droit qui dit que generaux renun[cia]tions ne vaut Encour ai je repris en fié doudit Jeham mon signour avec les choses dessusdites ce que li enfant de Vennes tiegnent de moy en la vile de Tornans en quelque chose que ce soit Et pour ce que ces choses soient fermées et estaublies j'ai proié et requis et fait metre le seel de la court de Besançon en ces presentes lettres en la jurisdiction de laquel court j'ay submis et submet moy et mes hoirs et tout mes biens pour tenir et garder toutes les choses dessusdites par laquel court je weil estre contrainc dou tenir si je venoie encontre Et nous li officiaus de la court de Besençon à la priere et à la requeste doudit Guillaume signour d'Arguel faite à nous par Guillaume de Vaux clerc juré de la court de Besençon mon comendement espicial pour ce envoié de part nous aquel nous avons quant à ceu doné nostre puissance et auquel nous avons pleniere foy liquex Guillaumes sires d'Arguel a confessé en droit par devant ledit nostre commandement toutes les choses dessusdites estres veraies et les a promis à tenir par sa foy corporelment donée en la main doudit nostre commandement et qui est en la jurisdiction de la court de Besençon quant à ce et wet estre contreinz de tenir les choses dessusdites par sentence d'escumeniement si façoit ou venoit encontre à la relation doudit nostre comandement avons mis le seel de la court de Besançon en ces presantes lattres en tesmoignage de verité qui furent faites le mardi après la quinzene de la resurrection Nostre Signor l'an mil CCC et IIII