Charter Document - 02220014

Nous officiaus de la court de Besencon faisons savoir à touz que par devant maistre Guillaume de Moustier Autepierre clerc juré de nostre court nostre commandement especiaul pour nous et en leu de nous por ce envoié et deputey aquel nous avons commis et commetons par ces lettres nostres veies personelment establiz nobles hons messires Thiebauz sires de Nuelchastel d'une part et noble et puissant baron messires Jan de Chalon sires d'Arlay d'autre part lidiz messires Thiebauz disant et afermant que li chastiaus et li bours de Monmartin sont de son fié lige devant touz aidables et receptable reprist en fié et en homaige lige le chastel et le bourc devantdit [dou] signor d'Arlay aidable et receptable devant touz et encontre contre touz comme fié lige comme ce qui estoit de son aluez si comme il disoit et en entra en sa foi et si an fit feauté et hommage Encor reprist lidiz Thiebauz en fié lige doudit signour d'Arlay mil livrées de terre à estevenans de son aluez que il a que l'on tient de luy ou val de Monmartin et à plus près de Monmartin lesquex mil livrées de terre il promist audit signour d'Arlay asseoir quant lui plaira selonc les usages de Bourgoigne et de ceste essise et de cest fié sont et doivent estre Loulanz Verchans et ce que messires Hugues de Chastillon tient de luy en la terre de Chastillon et ce que faudroit desdictes mil livrées de terre il doit parfaire et asseoir ensi comme dessus est dit au plus près de Monmartin en ce que il tient ou que l'on tient de luy Prometant lidiz sires de Nuefchastel pour lui et pour ses successeurs par solempnel stipulation adit signor d'Arlay present et recevent pour luy et pour ses hoirs et pour ses successours et par sa foy donnée en la main doudit nostre commandement tenir garder asservir et acomplir faire et parfaire les choses dessusdites et chascune d'icelles et faire garder et tenir audit signour d'Arlay toutes choses que leaus hons et vaillans vaussaus doit et est tenus de faire à son signor lige volanz et consentanz lidiz sires de Nuefchastel que nous li officiaus qui seront par le temps le contreigniez et ses hoirs à ces choses tenir per sentence d'escumeniement et de entredit de lours personnes et de lours terres liquex sires de Nuefchastel quant à ce a soumis à la jurisdiction de nostredite court luy et ses hoirs et leurs biens En tesmoignage de laquel chose à la relation doudit nostre commandement aquel nous avons pleniere foy nous officiaus devant dit avons mis le seel de ladite court en ces letres données le lundi après la saint Johan Baptiste l'an de grace mil CCC et onze presenz mons Johan signour de Mons mons Ourry Vae de Porrentru mons dit Moraille chevalier et Guiot d'Esterno escuier