Charter Document - 02220013

Charter Document - 02220013


Charter Number: 02220013
Cartulary Title: Cartulaire de Hugues de Chalon (1220-1319)
Charter Language: French
Charter Origin: Lay
Charter Type(s): Confirmation
Date: 1309
Date type: Internal, A.D., Feast
Resource Link(s): Patrimoine numérisé de Besançon - MS Droz 21 - Tome 1 (p.29)

Charter:

Nous Huedes de Ranz sires de Poupet dessus Salins chevaliers faisons savoir à touz que nous tenons et devons tenir nous et nostres hoirs em fié et em homage ligement nostre chastel de Poupet et toutes les appartenances et toutes les appendises doudit chastel de Poupet de très noble baron et puissant mons Jehan de Chalon seignor d'Arlay nostre très bien amé seignor douquel chastel de Poupet et de toutes les appartenances et appendises d'icelui nos sommes entrez en son homenoys et li avons reconui et reconuissons estre de son fié ligement par devant religieuses personnes mons Symon abbey de Bame dan Guillaume abbé dou Mont Sainte Marie et par devant noble chevaliers mons Girart d'Arguel mons Huedon signor de Monferrant mons Huedon de Toraise mons Villaume Le Maire mons Pierre de Husies Huguon de Toraise escuier Oudet de Chastelnuef Huguon Colon de Besençon clercs notour de la court de Besencon En tesmoignage de laquel chose nos avons fait seeler cez lettres dezdit abbés de Balme et dou Mont Sainte Marie et Huedes de Toraise devantdiz à la priere doudit mons Huedon de Ranz en tesmoignage de verité avons mis nous seauz en ces lettres données le dymenche après les witives de la nativité saint Jehan Baptiste l'an de grace mil CCC et nuef